O equipo de ACLUNAGA asistiu esta semana a unha das reunións organizadas pola Xunta de Galicia no marco da rolda de consultas iniciada, co obxectivo de acordar o documento inicial da Lei de Administración Ambiental Simplificada.

Durante a reunión, abordáronse os contidos e obxectivos da futura Lei de administración ambiental simplificada. A iniciativa busca reducir os tempos de tramitación dos expedientes ambientais, mellorando así a eficiencia administrativa e facilitando o cumprimento dos requisitos por parte de empresas e cidadáns.

O proceso de consulta impulsado pola Xunta de Galicia pretende recoller as achegas dos principais sectores, colectivos profesionais e entidades que poidan verse afectados directa ou indirectamente pola nova norma. Dende ACLUNAGA, valoramos positivamente a oportunidade de participar nesta fase de diálogo, xa que consideramos que é fundamental para garantir que as necesidades do sector naval sexan tidas en conta na redacción final da lei.

A implementación desta normativa supoñerá unha mellora significativa na simplificación de trámites para o sector, contribuíndo a facilitar o desenvolvemento de proxectos e promovendo prácticas sostibles. A participación de ACLUNAGA reforza o noso compromiso coa mellora continua e o cumprimento das normativas ambientais, aliñándonos cos obxectivos de sustentabilidade do sector naval en Galicia.